Абстаноўка ў раёне аэрапорта Грознага ў час, калі туды падлятаў Embraer 190 азербайджанскай авіякампаніі AZAL, які пасля разбіўся ў Казахстане, была «вельмі складанай», заявіў кіраўнік Расавіяцыі Дзмітрый Ядроў. Ён пацвердзіў, што ў сталіцы Чачні ўводзіўся план «Дыван» у сувязі з атакай беспілотнікаў.
«Украінскія баявыя беспілотнікі ў гэты час ажыццяўлялі тэрарыстычныя атакі на цывільную інфраструктуру ў гарадах Грозны і Уладзікаўказ», — растлумачыў чыноўнік, адзначыўшы, што «неабходна старанна і цалкам выверыць усе абставіны здарэння».
Ядроў запэўніў, што пасля крушэння пасажырскага лайнера расійскі бок «неадкладна паведаміў» калегам з Казахстана і Азербайджана пра сваю «поўную і ўсёабдымную гатоўнасць» супрацоўнічаць падчас расследавання таго, што здарылася.
Кіраўнік Расавіяцыі пацвердзіў, што ў сувязі з атакай беспілотнікаў у раёне аэрапорта Грознага непасрэдна перад крушэннем лайнера AZAL уводзіўся рэжым «Дыван», пры якім усе паветраныя судны мусілі пакінуць небяспечную прастору. У той жа час, дадаў Ядроў, у Грозным склаліся неспрыяльныя метэаралагічныя ўмовы — стаяў шчыльны туман, праз які «на вышыні 500 метраў не было бачнасці».
Пілот Embraer 190, паводле кіраўніка расійскага нагляднага ведамства, двойчы паспрабаваў пасадзіць самалёт у Грозным, але абедзве гэтыя спробы былі беспаспяховымі.
«Камандзіру прапаноўваліся іншыя аэрапорты. Ён прыняў рашэнне ісці ў аэрапорт Актау», — паведаміў Ядроў.
«Шмат розных абставінаў, якія неабходна сумесна расследаваць. Да гэтай працы ў супрацоўніцтве з калегамі мы цалкам гатовыя», — падсумаваў кіраўнік Расавіяцыі.
Нагадаем, авіякатастрофа адбылася 25 снежня. Самалёт Embraer 190AR «Азербайджанскіх авіяліній» выконваў рэйс Баку — Грозны. Яго перанакіравалі ў Махачкалу нібыта праз туман, а адтуль лайнер вылецеў у казахстанскі горад Актау з прычыны няштатнай сітуацыі. На борце было 67 чалавек, у тым ліку 16 расіян. З іх сямёра загінулі, агульная колькасць ахвяр — 38.
Выжылыя пасажыры расказалі, што на борце было некалькі выбухаў. Хваставая частка лайнера мела мноства адтулін, іх прычына пакуль не высветленая, але эксперты дапускаюць, што гэта можа быць абстрэл расійскай СПА над Чачнёй.