Кіраўнік Нацыянальнага антыкрызіснага ўпраўлення (НАУ) Павел Латушка адказаў на прапанову Аляксандра Лукашэнкі — той гатовы абмяняць асуджанага на 8 гадоў калоніі журналіста Анджэя Пачобута на ўвесь склад НАУ, яго адказ апублікаваў тэлеканал «Белсат».
«Ад свайго імені і ад імені мужчынскай часткі каманды НАУ — мы гатовыя на абмен, але ў нас ёсць умова. Мы гатовыя правесці абмен Паўла Латушкі і мужчынскай часткі каманды НАУ — але на ўсіх палітвязняў Беларусі», — сказаў Павел Латушка.
У Беларусі Паўла Латушку завочна асудзілі на 18 гадоў пазбаўлення волі.
Сёння, 31 сакавіка, Аляксандр Лукашэнка заявіў, што не гатовы вызваліць журналіста Анджэя Пачобута ў абмен на адкрыццё памежнага пераходу «Баброўнікі». Але гатовы абмяняць яго на Паўла Латушку і ўсю каманду НАУ.
«Сюды гэты ўрад у Беларусь на чале з Лахушкай (так Лукашэнка грэбліва называе Паўла Латушку. — Заўв. рэд.), і я ім аддаю Пачобута — да вечара вырашым гэтае пытанне. Я не супраць», — сказаў Лукашэнка.
Нагадаем, пункт пропуску «Баброўнікі — Бераставіца» на польска-беларускай мяжы з 10 лютага гэтага года афіцыйна прыпыніў афармленне транспартных сродкаў і асобаў, якія ідуць праз мяжу, на няпэўны час «у інтарэсах дзяржаўнай бяспекі».
8 лютага Гродзенскі абласны суд асудзіў журналіста, сябра пазбаўленага рэгістрацыі беларускімі ўладамі Саюза палякаў Беларусі Анджэя Пачобута на 8 гадоў калоніі ўзмоцненага рэжыму.
23 сакавіка міністр унутраных справаў і адміністрацыі Польшчы Марыюш Каміньскі заявіў, што «калі Анджэя Пачобута заўтра адпусцяць, то пераход у Баброўніках будзе адкрыты паслязаўтра».