Прапагандыстка Бондарава вырашыла праверыць адну з кнігарняў у Мінску ў пошуках дэструктыўных матэрыялаў і знайшла некалькі кніг, якія, на яе думку, трэба забараніць, бо яны прапагандуюць «дэструктыўныя ідэі» і «ЛГБТ». Пра свае знаходкі яна расказала ў сваім тэлеграм-канале.
«Сёння зазірнула ў кнігарню „Библио бай“, што ў студэнцкай вёсцы на Дзяржынскага, 91, у ГЦ „Алмі“. Спадзявалася, што пайду ні з чым, то-бок без фактаў распаўсюду дэструктыўных матэрыялаў. Не дачакалася», — напісала Бондарава.
У прыватнасці, яе абурыла серыя з пяці кніг «Такійскі гуль» аўтара Суі Ісіда. Яна пагугліла рэцэнзіі да гэтай мангі і прыйшла да высновы, што ў кнізе канібалізм падаецца як спосаб найвышэйшай арганізацыі суперграмадства.
«Увезеная ў РБ у 2022. На кнігах няма абмежавання па ўзросце! Уся серыя мае на мэце выклікаць спачуванне, а галоўнаму герою, які робіцца канібалам у выніку перасадкі яму органаў гуля — то-бок чалавекападобнага монстра-канібала. Хіба дзецям трэба рамантызаваць дэструктыўныя ідэі?» — напісала яна.
Бондарава лічыць, што гэтая літаратура «падпадае пад закон пра абарону правоў дзіцяці ў частцы інфармацыі, якая можа нанесці шкоду нармальнаму духоўнаму і маральнаму развіццю».
Яна прапанавала ўключыць гэтую серыю кніг у спіс забароненых матэрыялаў.
Таксама прапагандыстка сфатаграфавала ў краме кнігі кітайскай пісьменніцы Масян Тансю, якія палічыла ЛГБТ-літаратурай. Сваё меркаванне пра творы яна склала не пасля чытання, а на аснове водгукаў у інтэрнэце. Паводле яе, у гэтай краме пару гадоў таму яна знаходзіла такія кнігі, тады іх прыбралі.
«Цяпер дасталі зноў, толькі выклалі не на вітрыну ў аддзел „хіт продажу“, а на ніжнюю паліцу каля касы. Масян Тансю аўтар парадку 80 кніг. „Заснавальнік цёмнага шляху“ — адна з іх. Заскрыніла вам адзін з водгукаў. Гаворка пра адносіны геяў у кнізе, у пяці тамах. Масян Тунсю піша выключна на тэму ЛГБТ і адстойвае правы полавых дэвіянтаў у прэсе», — лічыць Бондарава.
Яна звярнула ўвагу, што кнігі кітайскай пісьменніцы фэнтэзійных раманаў у жанры даньмэй завезлі ў Беларусь у жніўні 2023 года.
Падчас руплівых пошукаў «дэструктыўных матэрыялаў» у краме Бондарава выявіла таксама кнігу «Хлопчыкі з могілак» Эйдэна Томаса, якую завезлі ў Беларусь у красавіку 2024 года.
Прапагандыстка лічыць, што адказныя за гэтую сферу чыноўнікі ў Беларусі працуюць не так, як варта было б, і ідзе «замыльванне праблемы прапаганды ЛГБТ у кнігагандлі». Яна прыйшла да высновы, што трэба вырашаць праблему на заканадаўчым узроўні: забараніць ЛГБТ-прапаганду і прапаганду змены полу, увесці пякельныя штрафы за парушэнне закона.
