Польскі трэвел-блогер Томаш Якімюк і ягоная спадарожніца Ханя пабывалі ў Беларусі і здзівіліся праверкам на мяжы: упершыню за 11 гадоў падарожжаў у іх папрасілі тэлефон. Пра перасячэнне мяжы і ўражанні ад Беларусі Томаш і Ханя расказалі на YouTube-канале Jak to daleko. Ролік заўважыў MOST.
Томаш Якімюк падарожнічае з 2013 года. У 2015 годзе ён завёў канал, дзе расказвае пра свае паездкі. Цяпер у канала 133 тысячы падпісчыкаў. Томаш пабываў у Афганістане, Пакістане, Судане, Ліберыі, Іраку, Расіі і ў многіх іншых краінах. А цяпер наведаў і Беларусь.
Мяжу вандроўнікі прайшлі за тры гадзіны. Сюрпрызы пачаліся адразу: на беларускім баку кожнага з маладых людзей запрасілі на асобную гутарку і папрасілі тэлефоны. Потым сілавік «увёў у тэлефон нейкі код». Палякі дапусцілі, што такім чынам спецслужбы могуць адсочваць іх геалакацыю.
Ханя спытала, ці можа ўбачыць, што правяральнік робіць у яе тэлефоне. Той патлумачыў маніпуляцыі нечаканым чынам:
— Сказаў, што, калі я скраду каўбасу ў краме, мяне знойдуць, — кажа дзяўчына.
Танная гарэлка і малако ў пакетах
У Брэсце блогеры вырашылі аформіць дамову на інтэрнэт, і Томаш здзівіўся, што гэта аказалася вельмі проста.
— Ні ў адной краіне не ўдавалася так хутка аформіць інтэрнэт, — кажа ён.
Вандроўнікі ацанілі і асартымент мясцовай крамы. Яны звярнулі ўвагу на танную гарэлку і шырокі выбар вінаў: з Грузіі, Малдовы, Іспаніі, Грэцыі, Аўстрыі і нават Азербайджана.
— Нават у Польшчы няма такіх [вінаў] з Азербайджана, — пракаментаваў гэта Томаш.
На даражэйшым алкаголі іх здзівілі біркі супраць крадзяжоў.
У цэлым цэны на прадукты блогеры называюць «чалавечымі», адзначаючы, што некаторыя прадукты за такія грошы ў Польшчы не купіць.
Томаш і Ханя шмат чулі пра якасць беларускай малочнай прадукцыі і асаблівую ўвагу надалі малочнаму аддзелу. Іх увагу забралі глазураваныя сыркі і жэле ў пластыкавых кубачках, а таксама малако ў пакетах. Яны ўспомнілі, што калісьці, гадоў дзесяць таму, такое прадавалася і ў Польшчы.
Боршч, дранікі і Ленін
Паабедаць вандроўнікі вырашылі ў кавярні. Замовілі боршч са смятанай і чорным хлебам і дранікі з грыбамі. Стравы ім спадабаліся, абое адзначылі, што і боршч — густы і духмяны, — і хлеб вельмі адрозніваюцца ад тых, што падаюць у Польшчы. Такога хлеба блогеры, паводле іх прызнання, не елі ніколі ў жыцці.
Таксама ўвагу падарожнікаў забраў помнік Леніну.
— Мала ёсць месцаў вакол Польшчы, дзе можна сустрэць таварыша Леніна, — заўважыў Томаш, успомніўшы, што ў Кракаве помнік яму дэмантавалі яшчэ ў 1989 годзе.
180 рублёў за ноч
Томаш і Ханя звярнулі ўвагу на чысціню брэсцкіх вуліц.
— Чыста, ціха, спакойна, элегантна, — ахарактарызаваў горад Томаш.
Таксама ён расказаў, што многія беларусы з’ехалі з краіны ў пошуках лепшага жыцця.
У гатэлі «Веста», дзе захаваўся «савецкі стыль», турысты пацікавіліся цэнамі на начлег. Аказалася, ноч абыдзецца ў 230 злотых (180 рублёў) на дваіх. У гэты кошт уваходзіць і сняданак.
Зрэшты, вандроўнікі праз знаёмых знайшлі, дзе спыніцца бясплатна. А нават калі б не паклапаціліся пра гэта загадзя, кажуць, што з лёгкасцю знайшлі б бясплатны варыянт. Напрыклад, іх запрашала да сябе выпадкова сустрэтая на вуліцы жанчына, якая расказала, што нарадзілася ў Польшчы.