Беларускія сіноптыкі кожны год фіксуюць рост колькасці неспрыяльных і небяспечных з’яваў у летні перыяд. Цяперашні адпускны сезон не стаў выключэннем, расказалі ў Белгідрамеце, пішуць «Мінск-Навіны».
Сёлета праз цёплае надвор’е час навальніц і бураў прыйшоў у Беларусь раней, чым звычайна.
«Моцныя залевы, навальніцы, град, шквалістае ўзмацненне ветру, смерчы адзначаюцца ў Беларусі штогод з той ці іншай інтэнсіўнасцю. Звычайна яны бурна пачынаюць праяўляць сябе ў ліпені і жніўні, але сёлета праз цёплае надвор’е ўсё пачалося значна раней — ужо ў траўні, да прыкладу, было 11 папярэджанняў на навальніцы і звязаныя з імі канвектыўныя з’явы, а за першыя дзве дэкады чэрвеня — восем», — расказала начальніца службы метэаралагічных прагнозаў Таццяна Чатырка.
Яна дадала, што прыродныя катаклізмы назіраюцца ўсё часцей у тым ліку праз змены клімату.
Таксама сіноптык дала прагноз, якой будзе другая палова лета ў Беларусі.
«Безумоўна, парадуе цёплымі днямі, але і ўзбадзёрыць пэўнымі неспрыяльнымі з’явамі. Будзе і спякота, і прахалода, і залевы з навальніцамі», — адзначыла Чатырка.
Аднак, паводле яе, трэба сачыць за кароткатэрміновымі і сярэднетэрміновымі прагнозамі надвор’я, бо мяжа яго прадказальнасці складае 14 дзён. За некалькі тыдняў назапашваецца такая хібнасць, што нават магутны суперкамп’ютар не можа даць надзейнага дэталёвага прагнозу, які выходзіць за гэтыя тэрміны. Самыя дакладныя прагнозы — трохдзённыя.