Беларускія сілавікі раскрылі карупцыйную схему ў аграсектары, на хабары трапіліся 14 службовых асобаў беларускіх аграпрадпрыемстваў, у тым ліку адзін дэпутат. Мінская фірма прадавала запчасткі па завышанай цане і стымулявала пакупнікоў адкатамі, паведаміў дзяржтэлеканал АНТ. Сумы хабару розныя — ад ста рублёў да некалькіх тысяч.
Сярод затрыманых — інжынер сельгаспрадпрыемства «Александрыйскае» ў Шклоўскім раёне, начальнік транспартнага ўчастка «Аграмаза», галоўны інжынер сельгаспрадпрыемства «Барсеева» ў Лёзненскім раёне, службовыя асобы гаспадаркі «Дабаснянскае» Кіраўскага раёна, прадпрыемства «Імянінскі» на Драгічыншчыне.
Мяркуючы з аператыўных відэа МУС, падчас затрымання з доказамі злачынства выкарыстоўваліся пазначаныя купюры і машыны без нумароў.
Аднаму з затрыманых задалі пытанне: «Ці з’яўляецеся вы дэпутатам якога-небудзь ўзроўню?» Мужчына пацвердзіў, што так.
«Памер хабару вар'іраваўся ў межах ад 8 да 12% ад аплачанага аб’ёму паставак. Хабар перадаваўся з дапамогай пасылак праз кіроўцаў маршрутных таксі, а таксама непасрэдна праз перавод на асабістыя карт-рахункі службовых асобаў», — расказаў намеснік начальніка ўпраўлення па барацьбе з эканамічнымі злачынствамі УУС Брэсцкага аблвыканкама Расціслаў Лявай.
Паводле звестак АНТ, на карупцыі падчас закупкі запчастак «трапіліся кіраўнікі і работнікі сельгаспрадпрыемстваў нават не кожнага рэгіёна, а кожнага раёна краіны».
Фігурант з Крупскага раёна расказаў, што браў грошы проста таму, што іх давалі, а галоўны інжынер сельгаспрадпрыемства «Барсеева» запэўніў, што выдаткоўваў атрыманыя сродкі на штрафы, якія выпісвалі МНС і ДАІ, — «кожны месяц па 16, па восем базавых».
Як сцвярджае тэлеканал, у фірме — прадаўцы запчастак за кожным менеджарам былі замацаваныя свае кліенты, а незаконны заробак дзялілі з кіраўніком. Усе фігуранты раскаяліся і супрацоўнічаюць са следствам.
Паводле звестак МУС, з пачатку года спыненая дзейнасць чатырох злачынных груп у сферы аграпрамысловага комплексу, якія займаліся «сістэмнай дзелавой карупцыяй».