Мінскі гарадскі суд вынес прысуд пяцярым мінчанам, якіх затрымалі восенню мінулага года за тое, што яны вывесілі на фасадзе дома нацыянальныя сцягі Беларусі і Украіны, паведамляе праваабарончы цэнтр «Вясна».
Мінчан затрымалі ў верасні мінулага года за тое, што яны вывесілі вялікія нацыянальныя сцягі Беларусі і Украіны на фасадзе дома на вуліцы Лесі Украінкі ў Мінску.
Аднамернікі аднаго з мужчын, Дзяніса Воразава, расказалі праваабаронцам, што яго затрымалі жорстка: «адвезлі ў лес і пагражалі».
На арганізатараў акцыі завялі крымінальную справу пра злоснае хуліганства, але праз два тыдні пасля затрымання МУС прызнала «экстрэмісцкім фарміраваннем» канал у праграме Zello, праз які яны размаўлялі. У выніку справа была перакваліфікаваная на ч. 3 арт. 361−1 КК (Стварэнне або ўдзел у экстрэмісцкім фармаванні) і ч. 2 арт. 361−4 КК (садзейнічанне экстрэмісцкай дзейнасці).
Закрыты працэс вяла суддзя Дзіна Кучук. Яна асудзіла Дзяніса Воразава і Вячаслава Панцюшчанку на пяць гадоў калоніі ўзмоцненага рэжыму, Вольгу Церах і Кацярыну Зарэцкую — на пяць гадоў калоніі агульнага рэжыму, Уладзіміра Лавора — на чатыры гады і дзевяць месяцаў калоніі ўзмоцненага рэжыму.
Праваабаронцы прызналі іх палітвязнямі.