На футбольным Еўра ў Германіі вызначыўся яшчэ адзін чвэрцьфіналіст. Зборная Грузіі саступіла іспанцам — 1:4.
Грузіны і так здзейснілі цуд на гэтым турніры. Дэбютанты Еўра ў заключным туры групавога этапу былі мацнейшыя за партугальцаў і выйшлі ў плэй-оф. Яшчэ адна вікторыя над топ-камандай здавалася чымсьці неверагодным. Плюс іспанцы больш адпачывалі перад 1/8 фіналу: яны першынствавалі ў сваім квартэце ўжо па выніках двух тураў і ў апошняй сустрэчы выставілі рэзервістаў.
«Чырвоная фурыя» адразу завалодала ініцыятывай і пачала плесці камбінацыі вакол штрафной. На 11-й хвіліне мяч ледзь не шмыгнуў у сетку брамы грузін пасля падачы з вуглавога.
Але, здаецца, іспанцы загуляліся і не чакалі, што апанент здольны агрызацца. А грузіны разгарнулі вельмі хуткую контратаку, дзе быў спрынтарскі рывок у выкананні Атара Какабадзэ, яго крос з правага флангу і аўтагол Рабена Лё Нармана.
🇬🥳#EURO2024 | #ESPGEO pic.twitter.com/3Bww71LjgQ
— UEFA EURO 2024 (@EURO2024) June 30, 2024
Іспанцам спатрэбіўся час, каб прыйсці ў сябе. У іх дзеяннях вырасла колькасць браку. Але, галоўнае, не было нестандартных хадоў, каб пераадолець абарону праціўніка.
На 35-й хвіліне ў Марка Кукурэльі атрымаўся добры стрэл, аднак Георгій Мамардашвілі ў скачку адвёў пагрозу. А вось Родры неўзабаве забіў — мэты дасягнуў шчыльны ўдар з левай нагі ў далёкі ніжні кут.
У дэбюце другога тайма «чырвоная фурыя» выйшла наперад. Самы малады гулец чэмпіянату Ламін Ямаль навесіў з флангу, і Фабіян Руіс засмуціў Мамардашвілі.
Пасля гэтага характар матчу не змяніўся. Іспанцы кантралявалі мяч і спрабавалі пры найменшай магчымасці біць па варотах, а грузіны шукалі шанцаў у контратацы. Але рэальных пагроз варотам «чырвонай фурыі» не было.
Усё стала ясна за чвэрць гадзіны да фінальнага свістка, калі Ніко Уільямс бліснуў індывідуальным майстэрствам, абыграўшы абаронцу, і стрэліў пад перакладзіну. А Дані Ольма зрабіў лік буйным: грузіны проста стаміліся пастаянна абараняцца пад прэсінгам супернікаў. Але назрад ці дэбютанты Еўра заслужылі хоць адзін папрок.
У чвэрцьфінале іспанцы сустрэнуцца з немцамі, якія напярэдадні адолелі датчан.
Футбол. Чэмпіянат Еўропы. 1/8 фіналу
30 чэрвеня. Іспанія — Грузія — 4:1 (Родры, 39, Фабіян Руіс, 51, Ніко Уільямс, 75, Ольма, 83; Лё Нарман, 18, аўтагол).
У астатніх матчах 1/8 фіналу згуляюць: 1 ліпеня. Францыя — Бельгія (19.00), Партугалія — Славенія (22.00). 2 ліпеня. Румынія — Нідэрланды (19.00), Аўстрыя — Турцыя (22.00).
